Türkiyənin ilk və tək sinema və televiziya muzeyi: TÜRVAK,.

Kino, Teatr Muzeyi və İncəsənət Kitabxanası ilk dəfə 2001-ci ildə Türkiyənin, Beyoğlunda Atlas, Şişlidə Kent, Beykoz Kavacıkda Boğaziçi sinemalarının qurucusu və sahibi, rejissor və ssenari yazarı Türker İnanoğlu tərəfindən 1997-ci ildən fəaliyyət göstərən Türker Vəqfi nəzdində xidmətə açılmışdır. 

Muzeyin, “Sinema muzeyi”, “Sinema və televiziya muzeyi” və “Teatr muzeyi” adlı mərtəbələrində yerləşdirilmiş, türk kino və teatrında əvəzsiz xidmətləri olan rejissor və sənətçilərinin adlarını daşıyan  13 salonda, türk kinosunun yarandığı gündən tarix boyu istifadə edilən cihazlar, Kemal Sunal, Adile Naşit, Tarık Akan, Yılmaz Güney, Sadri Alışık və başqa aktyor və aktrisaların balmumu heykəlləri, Türkiyədə sinemanın doğulduğu yer hesab edilən Beyoğlunun sinemalarına aid tarixi sənədlər, Çalıkuşu, Sürü, Kemal Sunal filmləri və s. kino afişaları, çağdaş türk teatrının yaradıcısı, 1922-1939- cu illərdə Türkiyədə kino çəkən yeganə rejissor Muhsin Ertuğrulun ilk səsli türk filmi olan “İstanbul küçələri” nin çəkdiyi kamera, Türkiyə Dövlət Televiziyasının (TRT) ilk ağ-qara və rəngli kameralarının da daxil olduğu 17000-dən çox eksponat sərgilənir. 

 4-cü mərtəbədə türk yazarı Murat Urazın oğlu rejissor, kino və teatr aktyoru Ulvi Urazın adını daşıyan kitabxana yerləşir.  Kitabxanada kino, teatr, mədəniyyətə aid kitab, jurnal, sənədlər arxivi və oxuma zalı var.  

Ən üst mərtəbə Haliç və Boğaz mənzərəli 250 nəfərlik teras kafe kimi xidmət göstərir.  Muzey həm də sənət, ədəbiyyat, mədəniyyət tədbirləri və sərgilərə ev sahibliyi edir. 

Türker İnanoğlu balmumu heykeli 

İş günləri: Çərşənbə axşamı - Bazar günü : 10:00 - 18:00

Qiymətlər: 10 türk lirası; Tələbə, müəllim və təqaüdçülər: 5 türk lirası.

Ünvan: Yeni Çarşı küçəsi 24, Galatasary meydanı, Beyoğlu. 

http://www.turvak.com/